یوازیتوب یوه لویه ستونزه ده، چې زیاتره انسانان یې خوښوي او یا هم زیاتره انسانان ځان یوازې ګڼي. په دې اړه بېلابېلې څېړنې شوې دي او ویل کېږي چې یوازیتوب د یوه انسان لپاره ډېر زیات زیان لري او د ډول ډول رواني ناروغیو لامل کېږي.

ساینس پوهانو په پنځوس کلنو او د زیات عمر لرونکو دوه زره کسانو باندې څېړنې کړې دي او د دغو څېړنو په وسیله دې پایلې ته رسېدلي دي، چې یوازیتوب تر چاغوالي لا ډېر خطرناک ده او همدارنګه د چاغښت په پرتله دوه چنده د مرګ سبب کېږي.

د بریتانیا یوه مرکز په دې اړه زیاتې څېړنې کړې دي او وایي، چې هر پنځم کس ځان یوازې ګڼي، دوی وایي چې د دې ستونزې د حل په موخه باید له خپلې کورنۍ، ملګرو او همکارانو سره ژوند وشي.

دا په داسې حال کې ده، چې بریتانیا د یوازیتوب لپاره ځانګړی وزارت هم لري.

د ټیکنالوژي په پرمختګ او د تلیفونو، کمپیوټرونو، ټولنیزو رسنیو او ویډیويي ګېمونو په زیاتېدو سره، زیاتره انسانان ډېری وخت په دې الو مصروف وي او له همدې امله له کورنۍ او ملګرو لرې پاتي کېږي، چې د یو څه وخت په تېرېدو سره د یوازیتوب احساس ورته پیدا کېږي.

نو تر ټوله غوره دا ده، چې د ټولنیزو رسنیو او ویډیویي ګېمونو کارونه په ورځني ډول باندې راکم کړای شي، تر څو له خپلې کورنۍ او ملګرو سره د اوسېدو وخت هم پیدا شي. په دې سره به مو هم له ملګرو سره اړیکې ښې شي او هم به د ټولنیزو رسنیو او ویډیويي ګېمونو کارونه راکمه شي، چې بېلابېل زیانونه لري.