لیکنه: هارون سمون

ځیني وایي، ایران اېټمي قدرت دی، ټېکنالوژۍ کې پرمختللی هېواد دی؛ خو پر عربي لیکدود فارسي لیکي.
کیسه دا ده، چې ایرانیان هم لکه موږ له ورته ستونزې سر ټکوي؛ ځکه چې ایران کې بار بار د لیکدود د بدلون کوښښ شوی؛ خو هلته آخوندان رأس کې دي او دا د دوی ستر خنډ و، کلونه وړاندې دا کار ایران کې د اخوند له لاسه د لیکدود تغیر ناممکن و.

اوس چې اخوندان پوه شوي، وخت تېر دی، ځکه ایراني فارسې دومره مواد لري، چې لاتین ته یې بدلول بېخي ناممکن شوي. زموږ پښتو خامه ده لا، هېڅ شی هم نه لرو.

د دوی ژبه یوازې منځنۍ آسیا کې یادېږي، نوره نړۍ اړتیا نه لري، چې فارسي زده کړي.
ایرانيانانو فارسي په ژباړه غني کړې، هغه هم ډېری ماشیني ژباړه ده. پاتې دې نه وي، چې ژباړه دویم متن دی.

ایران ټېکنالوژۍ کې له انګلېسي په پراخه پیمانه کار اخلي. بیا هم وایو عربي لیکدود ذاتاً د ټېکنالوژۍ لیکدود نه دی، زموږ د لیکدود سټایل ټېکنالوژۍ ته ورته نه دی او نه دا لیکدود ټېکنالوژۍ کې هغسې کارېږي، څنګه چې اړتیا ده.
عربي لیکدود د دیني متن لپاره ښایسته لیکدود دی، خدای پاک هر شی د بل شي لپاره مناسب پیدا کړي دي. دا د طبیعت خاصیت دی، آن د ښکلا خاصیت هم دا دی.
کورلا ته د تراکتور ستر ټایرونه اچول د کرولا موټر زیبايي له منځه وړي. د قرآن کریم اصلي متن په عربي لیکدود ښکلی ښکاري، که قرآن په لاتین ولیکل شي، طبعاً دغسې به ښایسته نه وي، لکه پر عربي لیکدود. د عربي لیکدود خاصیت د قرآن له وینګ سټایل سره منظم برابر دی او همدا لیکدود خدای ورته مناسب او ښایسته ګڼلی دی؛ خو ټېکنالوژۍ کې بیا دا لیکدود پراخه نشي کارېدای.

پښتو ژبه په حاکم لیکدود کې بنده شوې او دا لیکدود د تاریخ پاراډایم کې په زور تپل شوی دی. هیله لرو پښتو ژبه د دې زندان ځنځیرونه ژر وشلوي او لاتین لیکدود کې به د خپل پرمختګ خپله بقا ومومي.
پښتو تر دې مخکې لاتین ته په ورته سټایل(خروشتي لیکدود) لیکل کېده.